تاند「چهارشنبه د غبرګولي ـ جوزا ۲۱مه」د طالبانو د حکومت یوه ویاند په افغانستان کې د داعش د فعالیتونو په تړاو د روسیې د فدرالي امنیت د رییس څرګندونې بې اساسه وبللې.
د طالبانو د حکومت مرستیال ویاند حمدالله فطرت زیاته کړې، چې د دوی اړوند امنیتي ځواکونو د داعش خوارجو د فعالیتونو مخنیوی کړی او د هغوی هر ډول ګواښونه یې له منځه وړي دي.
فطرت د کابل ښار په ۱۵مه امنیتي حوزه کې د داعش چې طالبان یې خوارج بولي، پر یوه پټنځای وروستي عملیاتو ته په اشارې ویلي، چې دا ډول اقدامات د افغان ځواکونو د چټک غبرګون او پوره وېښتیا څرګندونه کوي.
نوموړي په ټینګار سره ویلي، چې د افغانستان په اړه د دا ډول اندېښنو څرګندول نه يوازې بې ځایه، بلکې د روان وضعیت له واقعي تصویر سره هم اړخ نه لګوي.
د سي ای اې پخوانۍ مامورې، سارا اډمز د داعش خراسان څانګې پر ضد د طالبانو ترهګرۍ ضد مبارزه جعلي بللې وه.
نوموړې په یوه بیان کې په ډاګه کړې وه، چې د کابل ۱۵ مې ناحیې قصبه کې د تېرې شپې برید چې طالبان ادعا کوي، د داعش پر یوه پټنځای یې کړی، ډرامه ده.
هغه وايي، د طالبانو استخباراتو یا GDI دا عملیات په هغه مرکز کړي، چې خپله د همدوی په واک کې دی، څو امریکا او متحدینو ته یې وښيي، چې د داعش پر ضد یې مبارزه واقعي ده.
د طالبانو کورنیو چارو وزارت د کابل په قصبه کې د تېرې شپې عملیات تایید کړي، خو د نوعیت او علت په اړه یې تر اوسه معلومات نه دي ورکړي.
د المرصاد په نامه د طالبانو اړوندې یوې رسنۍ بیا تایید کړې، چې د کابل ۱۵ مه ناحیه کې د داعش وسله والې ډلې پر پټنځای عملیات شوي.