تاند「پنجشنبه د غبرګولي ـ جوزا ۱۵مه」د طالبانو د بهرنیو چارو وزیر امیرخان متقي د ملګرو ملتونو سیاسي استازولۍ یا یوناما مشرې روزا اتونبایوا سره لیدنه کې د راستنېدونکو کډوالو پر اړتیاوو، نړۍ کې د مېشتو افغانانو پر ستونزو، خصوصي سکټور ودې او پانګونې پر جلب خبرې کړې دي.
د طالبانو بهرنیو چارو وزارت ویلي چې، متقي په دغه لیدنه کې په اروپا کې د مېشتو افغانانو ستونزو ته د دوی د لاسرسي او هغوی ته د کونسلي خدماتو وړاندې کولو غوښتنه کړې ده.
متقي همداراز غوښتنه کړې، چې یوناما دې په خپلو راپورونو کې پر واقعیتونو تمرکز وکړي.
بل لورته د یوناما مشرې ویلي،دوی راستنېدونکو کډوالو ته د ژوند اسانتیاوو سربېره افغانستان کې د کاري فرصتونو رامنځته کېدو او پانګونې جلب ته زمینه برابروي.
نوموړې ژمنه کړې، چې د ملګرو ملتونو او امنیت شورا راتلونکو ناستو کې به له نړېوالو سره افغانستان کې د راغلو پرمختګونو او فرصتونو په اړه معلومات شریک او د افغان حکومت پیغامونه به ولېږدوي.