تاند (پنجشنبه، د غبرګولي/ جوزا ۱۵ مه) د امریکا د سناجرګې په یوه دوه ګوندیزه هڅه کې، د جمهوریپال ګوند د الاسکا استازې، لیزا مرکاوسکي او د دیموکرات ګوند د نیوهمپشایر استازې، جین شهین، د ټرمپ د ادارې هغه پرېکړه په زغرده وغندله چې پر اساس یې په امریکا کې د څه باندې ۸۰۰۰ افغان وګړو د لنډمهالي خوندیتوب حالت (TPS) پای ته رسول کېږي.
سناتورانو په یوه ګډ لیک کې چې د بهرنیو چارو وزیر مارکو روبیو او د کورني امنیت وزیرې (کرستي نوم) ته استول شوی و، خپله ژوره اندېښنه څرګنده کړه او له ادارې څخه یې غوښتنه وکړه چې خپله پرېکړه له سره وارزوي.
سناتورانو لیکلي: «دا پرېکړه د هغو افغانانو په شمول چې د امریکا تر څنګ ودرېدل، د زرګونو کسانو ژوند په خطر کې اچوي.».
دوی همداراز په خپل لیک کې کښلي: «دا د هغو ژمنو تاریخي خیانت دی چې موږ کړې وې او هغه ارزښتونه کمزوري کوي چې موږ په افغانستان کې د شل کلنې مبارزې په لړ کې بیا بیا یادول.»
ټاکل شوې چې د TPS د ختمېدو پرېکړه د ۲۰۲۵ کال د جولای په میاشت کې عملي شي. دې چارې د افغاني ټولنې او د مدافع ډلو په منځ کې پراخې اندېښنې راپورته کړي دي.
ډېری هغو افغان کډوالو، چې د طالبانو تر واکمنۍ وروسته امریکا ته رسېدلي، د افغانستان په شل کلنه جګړه کې د امریکا ملاتړ کړی وو. اوس دوی له دې خطر سره مخامخ دي چې بېرته د طالبانو تر ولکې لاندې افغانستان ته وشړل شي، چې شرایط یې د امریکا له وتلو وروسته ډېر خراب شوي دي.
TPS په اصل کې د بایډن د ادارې له خوا د ۲۰۲۲ کال د مې په ۲۰مه افغان کډوالو ته ورکړل شو، څو له امریکا څخه د وتلو او د طالبانو له واک ته رسېدو وروسته د بشري ناورین په ځواب کې له دوی سره مرسته وکړي. دغه پروګرام هغو کسانو ته چې بېرته خپل هېواد ته خوندي ستنېدلی نه شي، د لنډمهالي قانوني وضعیت او د کار اجازه ورکړه.