تاند (چهارشنبه، د غبرګولي/ جوزا ۱۴ مه) د پاکستان حکومت وایي په اپرېل میاشت کې د افغان کډوالو د ایستلو د نوې لړۍ له پیله تر دې دمه یې تر ۲۰۰,۰۰۰ زیات افغانان ایستلي دي.

د پاکستان د کورنیو چارو وزارت فرانس پریس خبري آژانس ته ویلي، په اپریل کې تر ۱۳۵,۰۰۰ زیات افغانان له پاکستانه وتلي دي، دا شمېر په مې میاشت کې ۶۷,۰۰۰ ته راکم شوی، او د جون میاشتې په لومړیو دوو ورځو کې تر ۳,۰۰۰ څخه زیات کسان بېرته ستانه شوي دي.

په تېرو څو لسیزو کې میلیونونه افغانان د جګړو له امله پاکستان ته تللي دي. له ۲۰۲۱ کال وروسته چې طالبان بېرته واک ته ورسېدل، سلګونه زره نور افغانان پاکستان ته ورسېدل.

خو د پاکستان د کورنیو چارو وزارت زیاته کړې چې له ۲۰۲۳ کال راهیسې، چې اسلام‌اباد د افغانانو د شړلو هڅې پیل کړې، تر یو میلیون زیات افغانان له پاکستانه وتلي دي.

د ملګرو ملتونو د کډوالو نړیوال سازمان (IOM) د سې شنبې په ورځ وویل چې له ایران څخه د افغان کورنیو په شړلو کې زیاتوالی راغلی دی. یوازې په مې میاشت کې ۱۵,۶۷۵ افغانان له ایران څخه وتلي چې د تېرې میاشتې په پرتله دوه برابره زیاتوالی ښيي.

 د کډوالو نړیوال سازمان په یوه خبرپاڼه کې وویل چې دا ډله‌ييز حرکت په افغانستان کې د خلکو د منلو او بېرته یوځای کولو د نازکو سیستمونو لپاره لوی ګواښ دی.

د پاکستان د کورنیو چارو وزارت له افغان تابعیت لرونکو کارت (ACC) لرونکو څخه، چې په پاکستان کې اوسي، غوښتنه کړې چې د مارچ تر ۳۱ پورې دې له دې هېواده ووځي.

په رسمي خبرپاڼه کې د کورنیو چارو وزارت ویلي: “د ناقانونه بهرنیانو د شړلو پروګرام (IFRP) د ۲۰۲۳ کال د نوومبر له ۱ نېټې څخه پیل شوی دی. د ناقانونه بهرنیانو د شړلو په اړه د حکومت پریکړې ته په دوام کې، اوس د ملي مشرتابه له خوا پرېکړه شوې چې ACC لرونکي افغانان هم وباسي.”