تاند【دوشنبه د غبرګولي ـ جوزا ۱۲مه】پنجشېر ولایت کې د طالبانو سیمه ییز مسئولان وایي، روان کال به له دې ولایت نه ۱۰۰ ټنه ګیلاس ازبکستان، قرغزستان او روسیې ته صادر شي.
پنجشېر کې د طالبانو د ولایت ویاند سیف الدین لټون ویلي، د یاد ولایت باغ لرونکو تېر کال د ګیلاس پلور له درکه ۳۶۰ ملیونه افغانۍ عواید ترلاسه کړي و، چې بهر ته په صادرېدو سره به یې نور هم عاید زیات شي.
باغ لرونکي هم بهرنیو بازارونو کې د خپلو محصولاتو پلور ته خوښ دي او وایي، بهر ته به یې صادرات په عوایدو کې د پام وړ زیاتوالی راولي.
د منځنۍ اسیا هېوادونو ته د افغانستان کرنیزو محصولاتو د صادراتو هڅې داسې مهال زیاتې شوې، چې وروستیو میاشتو کې د پاکستان له لوري د مېوې صادراتو پر وړاندې د ستونزو جوړول افغان سوداګرو او باغ لرونکو ته درانه زیانونه اړولي دي.