تاند【یکشنبه د غبرګولي ـ جوزا ۱۱مه】د طالبانو د کانونو او پټرولیم وزارت، د جوزجان په یتیم تاق سیمه کې د ګازو د درېیو څاګانو کیندنې تړون له ترکي شرکت سره لاسلیک کړ.
د یاد وزارت سرپرست هدایت الله بدري دغه تړون د یاد شرکت له استازي سوانداج سره لاسلیک کړ.
د طالبانو د کانونو او پټرولیم وزارت د معلوماتو له مخې د تړون پر اساس به قراردادي شرکت په یادو څاګانو ۸ ملیونه ډالر پانګونه کوي.
دغه راز د تړون پر اساس قرار دادي شرکت اړ دی، چې د یو کال موده کې د درېیو څاګانو د کیندنې چارې بشپړې کړي.
د معلوماتو له مخې د یادو څاګانو په بشپړېدو سره به په یوه شپه او ورځ کې ۱۰۰زره متر مکعب ګاز استخراج شي.
د نظر خاوندان بیا دا یو ښه اقدام بولي او زیاتوي، چې په دې سره به د ګازو له پلوه د خلکو اړتیاوې تر یوه بریده پوره شي.