تاند【پنجشنبه د جوزا ـ غبرګولی لومړۍ】د طالبانو د حکومت د بهرنیو چارو وزیر امیرخان متقي د چین پرمختیایي همکاریو ادارې رئیس چن ژیاؤډونګ سره کتنه کې د افغانستان بیارغونه کې د چین پر پرمختیایي پروژو او دوه اړخیزو همکاریو بحث خبرې کړې دي.
د طالبانو د بهرنیو چارو وزارت د خبر له مخې په دې کتنه کې امیرخان متقي له امنیت وروسته د هېواد د اقتصاد رغونه خپل لوی مسوولیت یاد کړی دی.
متقي هیله ښودلې چې د کرنې، انرژۍ او اوږدمهاله پروژو برخه کې د افغانستان او چین ترمنځ نږدې همکاري رامنځته کړي.
نوموړي د چین پرمختیایي همکارې ادارې ته هغه عملي وړاندیزونه هم ورکړي، چې له مخې یې دغه اداره د افغانستان بیارغونه کې ترې د لومړیتوبونو په توګه کار اخېستلی شي.
بل لورته چن ژیاؤډونګ د افغانستان بنسټیزو تاسیساتو ابادۍ، مالدارۍ نفت او ګازو د امکان سنجۍ، مطالعې او څېړنو برخه کې د همکاریو ژمنه ورکړې.
دا ناسته داسې مهال کېږي، چې د طالبانو د بهرنیو چارو سرپرست وزیر امیرخان متقي د چین په کوربتوب د افغانستان، چین او پاکستان بهرنیو چارو وزیرانو درې اړخیزه غونډه کې د ګډون لپاره چین ته تللی دی.