تاند【دوشنبه د ثور ـ غویي ۲۹مه】اسراییلو هوکړه کړې، چې له څو میاشتني بندیز وروسته د غزې خلکو لپاره د خوړو محدود شمېر بشري مرستو او خوړو ته د دې لپاره اجازه ورکوي، چې پلان لري د غزې شمال او جنوب کې د حماس پر ضد ځمکني عملیات پیل کړي.
د نتانیاهو دفتر ویلي، چې د اسراییلي پوځ په مشوره او د حماس د ماتولو لپاره د سختو عملیاتو پراخولو اړتیا له مخې،دوی به د غزې خلکو لپاره دومره خوړو ته اجازه ورکړي، چې د لوږي بحران رامنځته نه شي.
دا په داسې حال کې ده چې د ملګرو ملتونو سرمنشي انتونیو ګوتریش پرون یکشنبه د غزې پر لوږې او محاصرې ساتلو یې سخته نیوکه کړې وه.
بل لورته د امریکا ولسمشر ډونالډ ټرمپ هم د منځني ختیځ د سفر پای ته رسولو پر وخت ویلي، چې د غزې خلک وږي دي او باید دواړو خواوو ته پام وشي.
په ورته مهال بیا د فلسطین د روغتیايي چارواکو په وینا یوازې په تېره اونۍ کې نږدې ۵۰۰ کسان د اسراییلو په هوايي بریدونو کې وژل شوي او سلګونه نور ټپیان شوي دي.
د راپورونو له مخې غزه نه یوازې د بشري مرستو او خوړو بحران سره مخ ده، بلکې د درملو کمښت او د ټپیانو د انتقال لپاره یې ۷۵ سلنه امبولانسونه د سون توکي یا تېل هم نه لري.
پر حماس د اسراییل پوځ د عملیاتو پراخوالی او د بشري مرستو د لېږد لارې بندولو له امله غواړي فشار راوړي، څو اسراییلي یرغمل شوي خوشې او په وینا یې حما.س له منځه یوسي.