تاند (جمعه، د غويي/ ثور ۲۶ مه) د روسیې مرستیال صدراعظم الیکسي اوروچک وايي، د افغانستان له لارې د ټرانس-افغان رېللارې سروې به د راتلونکی کال په پیل کې بشپړه شي.
ده دا خبره پرون (پنجشنبې) د روسیې–اسلامي نړۍ په ۱۶م نړیوال اقتصادي فورم کې وکړه.
هغه وویل: «د روسیې او ازبکستان د رېللارې متخصصان د ټرانسافغان رېلپټلۍ د جوړولو لپاره پر سروې ګډ کار کوي. تمه ده چې دا مطالعه د ۲۰۲۶ کال په پیل کې چمتو شي.»
د ټرانسافغان ترانسپورتي دهلېز به اروپایي ټولنه، روسیه، ازبکستان، افغانستان، پاکستان، هند او جنوب ختیځه آسیا سره ونښلوي. ازبکستان په ۲۰۲۳ کال کې اعلان کړی و چې له یو شمېر هېوادونو سره یې د دې پروژې د پلي کېدو هوکړه کړې ده، چې اصلي برخهوال یې، پر ازبکستان سربېره، افغانستان او پاکستان دي.
د روسیې د ګډون په اړه یوه موقتي هوکړه د ۲۰۲۴ کال د اپرېل په پیل کې مسکو ته د ازبکستان د ولسمشر شوکت میرضیایف د سفر پر مهال شوې وه.
د ازبکستان د ترانسپورت وزارت مخکې ویلي و چې د ټرانسافغان رېللار به لږ تر لږه په پنځه کاله کې بشپړه شي، او اټکل شوی چې تر ۴.۸ میلیارد ډالرو پورې پرې ولګېږي.
د روسیې د صدراعظم لومړي مرستیال دینیس مانتوروف تېره میاشت (اپریل) انټرفکس خبري اژانس ته ویلي و چې د ترانس افغان ریللارې د جوړېدو په صورت کې به ممکن هر کال روسیه په دې لاره له ۸ میلیونه تر ۱۵ میلیون ټنه سوداګري مال انتقال کړي.