تاند (شنبه، د غويي/ ثور ۲۰ مه) د هند د دولت لپاره د بهرنیو چارو وزیر وکرم میسري د شنبې په ورځ د پاکستان هغه ادعا کلکه رد کړه چې ګواکې د هند توغندیو افغانستان ویشتی دی، او دا یې “بشپړه بېاساسه تورونه” وبلل.
میسري، چې د هند د پوځ له ډګرمنې صوفیه قریشي او د هوايي ځواک د څانګې له قوماندان ویمیکا سینګ سره په یوه ګډ خبري کنفرانس کې خبرې کولې، د افغانستان له خلکو وغوښتل چې یاد وساتي کوم هېواد بیا بیا په هغوی بریدونه کړي. د ده اشاره پاکستان ته وه چې په وروستیو څو کلونو کې یې په ځلونو د افغانستان پر خاوره بریدونه کړي دي.
هغه وویل:
“د افغانستان خلکو ته اړتیا نشته چې څوک یې یاد کړي — هغه هېواد چې تل یې پر ملکي وګړو او زیربناوو بریدونه کړي، حتی د تېر یو نیم کال په جریان کې.”
میسري پاکستان تورن کړ چې د نهیلۍ یې د دروغو کمپاین پیل کړی څو هند یرغلګر وښيي.
له بلې خوا د طالبانو د حکومت د دفاع وزارت هم د پاکستان د پوځ دا ادعا رد کړه چې ګنې د هند پوځ پر افغانستان توغندویي برید کړی دی.
د طالبانو د دفاع وزارت ویاند عنایت الله خوارزمي سیمه ییزې راډیو حریت ته ویلي چې د افغانستان پر خاوره د هند د توغندي د لګېدو ادعاوې حقیقت نه لري.
د پأاکستان د پوځ ویندوی تېره شپه وروسته له دې چې هند د پاکستان په پنجاب ایالت کې پر دروړ پوځي اډو د کروز توغندو بریدونه وکړل، وویل چې هند د افغانستان خاوره هم ویشتې ده.