تاند【شنبه د ثور ـ غویي ۲۰مه】د راپورونو له مخې د پاکستان پر درېیو هوايي اډو د هند له برید وروسته دغه هېواد هم د هند خلاف ځوابي ګامونه پورته کړي دي.
پاکستان خپلو عملیاتو ته (بنیان مرصوص) عملیاتو نوم ورکړی دی.
د وروستیو راپورونو له مخې ځوابي اقداماتو کې د پټانکوټ او اودامپور پوځي اډو په ګډون د هند بېلابېل پوځي اهداف په نښه شوي دي.
د پاکستان پوځ ادعا کړې چې د هند د هوايي دفاع سیستم د ویجاړېدو سربېره یې سایبري بریدونه هم ترسره کړي دي.
بلخوا د پاکستان لومړي وزیر شهباز شریف بیا د ملي قوماندې ادارې غونډه رابللې ده.
د هند دفاع وزارت بیا ویلي چې پاکستان د هند پر خپلواکۍ تېری کړی او د عامو خلکو ژوند یې ګواښلی دی.
د هند او پاکستان ترمنځ د زیاتېدونکي کړکېچ په لړ کې، هندي رسنیو د دغه هېواد د هوايي ډګرونو ادارې په حواله راپور ورکړی چې حکومت د شمالي او لوېدیځ هند ۳۲ هوايي ډګرونه په موقته توګه تړلي دي.
ویل کېږي چې دا پرېکړه وروسته له هغه شوې، چې د کشمیر په سرینګر ښار کې د درنو چاودنو غږونه اورېدل شوي.
چارواکي وایي، دا بندیزونه د پاکستان له احتمالي بریدونو سره هممهاله لګول شوي، خو دا لا معلومه نه ده چې دغه هوايي ډګرونه به کله بېرته فعالیت پیل کړي.
د پاکستان او هند ترمنځ کړکیچ وروسته له هغې زیات شو کله چې د هند تر ولکې لاندې کشمیر پهلګام کې وسله والو ۲۶ هندي سیلانیان ووژل او هند یې پړه پر پاکستان واچوله.