تاند (جمعه، د غويي/ ثور ۱۹ مه) په کابل کې د ایران سفارت په یوه خبرپاڼه کې ویلي چې د هلمند د اوبو د دوهاړخیز تړون له مخې،د افغانستان او ایران د اوبو د کمېسارانو د ګډې کمیټې نههویشتمه ناسته، د ۱۴۰۴ لمریز کال د ثور په ۱۷مه او ۱۸مه نېټه په کابل کې جوړه شوې ده.
یاده ناسته د دواړو هېوادونو ترمنځ د ګډو اوبو د سرچینو د مدیریت او د هلمند تړون د دقیقې اجرا په هدف، د تخنیکي او دیپلوماټیکو تعاملاتو په چوکاټ کې ترسره شوې او د دواړو لوریو د رسمي استازو په ګډون جوړه شوې ده.
په دې خبرو کې دواړو خواوو د هلمند سیند د اوبو د بهیر وضعیت، د اوبو د ونډې اړوند مسائلو، د کجکي بند حالت او نورو تخنیکي موضوعاتو په اړه بحث او نظریات تبادله کړل.
د ایران د تسنیم خبري اژانس د راپور پر اساس، د دې ناستې موخه د اوبو په برخه کې د همکارۍ ښهوالی، د احتمالي ترینګلتیاوو کمول او د دوهاړخیزو موافقو د پلي کېدو په بهیر کې زیات شفافیت رامنځته کول ښوول شوي دي.
د هلمند د اوبو د ګډې کمیټې ناستې د ۱۳۵۱ لمریز (۱۹۷۳ میلادي) کال د تړون له مخې له هغو لاروچارو څخه ګڼل کېږي، چې د ایران او افغانستان ترمنځ د موافقو د تطبیق څارنې او د احتمالياختلافاتو د حل لپاره تعریف شوي دي.