تاند (دوشنبه، د غويي/ ثور ۸ مه) د افغانستان پخواني ولسمشر حامد کرزي د یکشنبې په ورځ له هند څخه وغوښتل چې د افغان محصلانو لپاره خپل سکالرشیپونه (بورسونه) بیا پیل کړي.
ښاغلي کرزي ټینګار وکړ چې د افغانستان د روانو بحرانونو په ترڅ کې د لوړو زده کړو د فرصتونو ملاتړ ډېر ضروري دی.
کرزي په ایکس (پخواني ټویټر) کې په یوه پیغام کې وویل چې دغه موضوع یې د هند د بهرنیو چارو وزارت له ځانګړي استازي انند پراکاش سره په کتنه کې مطرح کړې ده.
کرزي هیله وښوده چې په هند کې د افغان محصلانو پر وړاندې خنډونه به له منځه لاړ شي او د زده کړو د دوام لارې به بېرته پرانیستل شي.
هغه د افغانستان او هند ترمنځ د اقتصادي او تجارتي اړیکو د پیاوړتیا پر اهمیت هم ټینګار وکړ، او یادونه یې وکړه چې پراخه همکاري کولی شي د افغانستان د پرمختګ او اقتصادي بیا رغونې لپاره مهمه ونډه ولري.
هند د ۲۰۲۱ يه اګست کې د طالبانو له بیا واک ته رسیدو وروسته افغان مححصلانو ته سکالرشیپونه درولي دي.
هند په تاریخي ډول هر کال زرګونو افغان محصلانو ته په بېلابېلو برخو کې د زده کړو بورسونه برابر کړي دي.