تاند【یکشنبه د ثور ـ غویي ۷مه】د کډوالو په چارو کې د ملګرو ملتونو عالي کمېشنرۍ ویلي، چې د اپریل میاشتې له پیله تر اوسه له پاکستانه کابو ۱۲۰ زره افغان کډوال راستانه کړل شوي دي.
د یو این اچ سي آر عالي کمېشنر عرفات جمال پرون له تورخم څخه د لیدنې پرمهال دا څرګندونې کړې دي.
د عرفات جمال په خبره، په راستنو شویو کې نجونې او مېرمنې هم شته چې زدهکړو او کار ته د محدود لاسرسي په برخه کې له ورک راتلونکي سره مخامخ دي.
سرچینې زیاته کړې چې د کډوالو په چارو کې د ملګرو ملتونو عالي کمېشنري د بېړنیو مرستو په وړاندې کولو له هغوی ملاتړ کوي، خو اړتیاوې زیاتې دي.
بل لورته د ملګرو ملتونو د کډوالو عالي کمېشنرۍ عملیاتي مرستیال روف مازو پر نړیوالې ټولنې غږ کړی، چې د افغان کډوالو د ملاتړ لپاره دې خپلې هڅې ګړندۍ کړي.
روف مازو له لویدیځو هېوادونو غوښتي چې د هغو افغانانو د لېږد بهیر چټک کړي چې پاکستان کې دغو هېوادونو ته د سفر په تمه دي.
د پاکستاني رسنیو د راپور له مخې، نوموړي اسلام اباد ته د خپل سفر په وروستۍ ورځ (جمعه، د غویي ۵مه) د افغان کډوالو د ملاتړ په موخه د نویو لاریو پر پیداکولو ټینګار کړی او زیاته کړې یې ده چې د کډوالو داوطلبانه ستنولو لپاره باید زمینه برابره شي.
د راپور له مخې، هغه دغه سفر کې له بېلابېلو پاکستاني چارواکو سره پر دغو ستونزو خبرې کړې دي.