تاند【یکشنبه د ثور ـ غویي ۷مه】د ایران په بندر عباس کې د پرون شنبې ورځې چاودنې له امله لږ تر لږه ۱۸ تنه وژل شوي او له ۷ سوو زیات نور ټپیان دي.
رویټرز خبري اژانس راپور ورکړی چې د ایران د ناورین مهارولو ادارې ویاند ویلي، د بندر عباس په شهید رجایي بندر کې دغه چاودنه په کانټینرونو کې د کیمیاوي توکو د ناسمې ساتنې له امله رامنځته شوې ده.
هغه زیاته کړې چې تر دې وړاندې هم د دغو کیمیاوي توکو د چاودنې خبرداری ورکړل شوی و.
دا چاودنه پرون شاوخوا ۱۲ بجې وشوه.
دا چاودنه داسې مهال کېږي، چې هممهاله په عمان کې د ایران او امریکا د خبرو درېیم پړاو پیل شوی.
ایراني چارواکو ویلي، چې د چاودنې غږ تر ۳۰ کیلو مټرو پورې اورېدل شوی دی.
د یادونې ده چې په ۲۰۲۰ کال کې د همدې بندر کمپیوټرونه د یوه سایبري برید له امله زیانمن شوي وو، چې د لارو او اوبو د تګ راتګ پر سیستم یې اغېز کړی و.
اسراییل له امریکا غوښتي چې د ایران پر اتومي تاسیساتو ځواکمن بمونه واچوي