تاند (جمعه، د وري/ حمل ۲۹ مه) د افغانستان لپاره د روسیې ځانګړي استازي ضمیر کابلوف، ویلي چې د روسي او چینایي شرکتونو ترمنځ همکاري د افغانستان په بیا رغونه کې مهم رول لوبولی او په ټوله سیمه کې ثبات پیاوړی کولی شي.
کابلوف دا څرګندونې د «سولوویوف لایو» په نوم په یوه ژوندۍ تلویزیوني خپرونه کې وکړې.
هغه وویل چې د چینایي شرکتونو ګټې په افغانستان کې د مسکو له هدفونو سره په ټکر کې نه دي، او د دواړو قدرتونو ترمنځ د سیالۍ ادعا یې رد کړه.
ده زیاته کړه: «برعکس، دا همکاري کولای شي یو مثبت عامل شي چې ثبات پیاوړی کړي. ثبات یو پراخ مفهوم دی چې د خلکو ټولنیز او اقتصادي وضعیت هم پکې شامل دی. که د پانګونې دا هڅې د علاقمندو هېوادونو، په تېره بیا د سیمې د هېوادونو له لورې، د افغانستان د خلکو د ژوند شرایط ښه کړي، نو دا به د ټولې سیمې ثبات ته ګټه ورسوي.»
کابلوف د افغانستان په اړه د روسیې او چین دریځونه د بریتانیا له پخوانیو سیاستونو سره پرتله کړل، ویې ویل چې بریتانیا افغانستان هیڅکله شریک نه، بلکې یوازې د امپراتورۍ په سیالیو کې یوه وسیله بلله، چې دا چلند یې بالاخره له ناکامۍ سره مخ شو.
د ۲۰۲۱ په اګست کې له افغانستانه د امریکايی پوځیانو له وتلو او د طالبانو له بیا واک ته رسیدلو وروسته ظاهراً په افغانستان کې د چین د لېوالتیا د زیاتېدو او د چین له لوري په افغانستان کې د پراخو پانګونو د احتمال خبرې کېږي خو عملاً چینایانو د پام وړ پانګونه نه ده کړې او نه یې د لوېدیځو هیوادونو په شان په یاده موده کې له افغانستان سره بشري مرستې کړي دي.