تاند【پنجشنبه د حمل ـ وري ۲۸مه】افغانستان لپاره د پاکستان ځانګړي استازي صادق خان د طالبانو حکومت د بهرنیو چارو وزیر امیرخان متقي سره لیدلي دي.
نوموړي په دې لیدنه کې ویلي، چې د پاکستان د لومړي وزیر مرستیال او بهرنیو چارو وزیر اسحاق ډار به راتلونکي کې کابل ته سفر ولري.
صادق خان او امیر خان متقي ټینګار کړی، چې راپورته شوي مسایل به د باور په فضا کې په خبرو اترو حل کړي.
د افغانستان لپاره د پاکستان ځانګړي استازي په کابل کې د همغږۍ ګډې کمېټې اوومې غونډې په تړاو ویلي، چې د ورته میکانېزمونو له لارې دوامداره ښکېلتیا د دواړو هېوادونو ترمنځ تاوتریخوالي کمولو او په دوه اړخیزو اړیکو کې د متقابل تفاهم پیاوړتیا لپاره اړینه ده.
د وروستیو راپورونو له مخې د طالبانو حکومت او پاکستان اړیکې د افغان کډوالو، ډیورنډ فرضي کرښې پر سر شخړو او د افغانستان له خاورې پاکستان ته د امنیتي ګواښونو له امله د تېر په پرتله ډېر ترینګلې شوي.
د طالبانو حکومت چارواکي وايي له ۱۵ میاشتني ځنډ وروسته په کابل کې د همغږۍ ګډې کمېټې ناسته هم د همدې موخې لپاره رابلل شوې، څو له پاکستان سره راپورته شوې ستونزې د خبرو اترو له لارې حل کړي.
د دواړو هېوادونو ترمنځ د راپورته شویو ستونزو د حل لپاره داسې مهال پر خبرو ټینګار کېږي، چې پاکستان د افغانستان پر خاوره د بریدونو سربېره ادعا کوي چې له کږدې غاړې وسله والې ترهګرې ډلې ور اوړي او د یاد هېواد امنیت ګواښي، هغه چې افغان لوری یې په کلکه ردوي.
د نظر د خاوندانو په باور د طالبانو او پاکستان اړیکې هېڅکله زیانمنې شوې نه دي او ټینګار کوي چې طالبان دې په ښکاره توګه له پاکستان د کډوالو ځورونې مخنیوي او د افغانستان پر خاوره د بریدونو نه کولو تضمین واخلي.