تاند【یکشنبه د حمل ـ وري ۲۴مه】د طالبانو د حکومت صنعت او سوداګرۍ وزارت سرپرست نورالدین عزیزي کابل کې د پاکستان له سفیر عبدالرحمن نظاماني سره پر سوداګرۍ خبرې کړې دي.
یاد وزارت خبر ورکړی، چې دواړو لوریو د دوه اړخیزې سوداګرۍ برخه کې د همغږۍ زیاتېدو او د ټرانزیټ پر وړاندې د ستونزو پر حل خبرې کړي.
سرچینې زیاته کړې چې، دواړه لورو په دې لیدنه کې د همکارۍ پر اړتیا او د دواړو هېوادونو ترمنځ د سوداګرۍ او ټرانزیټ پروسه کې د اسانتیاوو په موخه په ګډو پرېکړو ټینګار کړی دی.
د پاکستان او افغانستان ترمنځ د سوداګریزو اړیکو د پراختیا په اړه داسې مهال دا ناسته کېږي، چې تر دې وړاندې پاکستاني رسنیو په خپلو راپورونو کې ویلي وو، چې د دواړو هېوادونو ترمنځ د سوداګرۍ په اندازه کې ۶۶ سلنه کموالی راغلی دی.
د افغانستان او پاکستان تر منځ سوداګري وخت ناوخته د سیاسي اړیکو قرباني وي.
اقتصاد پوهان ټینګار کوي، چې دواړه لوري دې د همغږۍ په ناستو کې په دې هڅه وکړي څو له سیاسي څپې سوداګري جلا کړي.