تاند【شنبه د حمل ـ وري ۲۳مه】د طالبانو د حکومت د صنعت او سوداګرۍ وزارت وایي، چې افغانستان تېر کال د ۱۶۵ ملیونه ډالرو په ارزښت انځر بهرنیو هېوادونو ته صادر کړي دي.
د یاد وزارت ویاند اخندزاده عبدالسلام جواد وایي، په دې موده کې د افغانستان انځر هندوستان، پاکستان، متحده عربي اماراتو، امریکا، عمان، قطر، برېتانیا، کاناډا او هالنډ ته صادر شوي دي.
د هغه په خبره، یادو هېوادونو ته په یاده موده کې ۳۲زره ۸۱۴ ټنه انځر صادر شوي دي.
د یادونې ده، چې تر دې وړاندې د صنعت او سوداګرۍ وزارت راپور ورکړی و، چې افغانستان د تېر کال په ۱۱میاشتو کې د ۱۴ملیونه ډالرو په ارزښت تورې جلغوزې نړېوال بازار ته صادرې کړې دي.
د افغانستان وچه میوه د ښه کیفیت له امله په نړیوال بازار کې ښه نوم او مینه وال لري.
اقتصاد پوهان وایي که دې برخې ته پام وشي نو افغانستان به د وچو میوو له درکه له نړیوال بازاره ډېر عاید ترلاسه کړي.