تاند (چهارشنبه، د وري/ حمل ۲۰مه) د امریکا ولسمشر دونالډ ټرمپ له چین څخه پر وارداتو ۸۴ سلنه نوره تعرفه ولګوله، په مقابل کې یې چین د ورته اقداماتو ژمنه وکړه.
چین ژمنه کړې چې «تر پایه به وجنګېږي»، او وروسته له دې چې د ونډو بازارونو په شدید ډول راولوېدل، ویې ویل چې د خپلو ونډو د بازار د ثبات لپاره به اقدامات پیل کړي.
د امریکا د ولسمشر ډونالډ ټرمپ ادارې اعلان کړی چې د چین پر ټولو وارداتو به د چهارشنبې په ورځ ۸۴ سلنه اضافي تعرفې ولګوي. د سپینې ماڼۍ ویاندې، کارولین لیویت، خبریالانو ته وویل:
«له دې سره به د چین پر ټولو توکو لږ تر لږه ۱۰۴ سلنه تعرفه ولګول شي.»
لیویت زیاته کړه: «هغه هېوادونه لکه چین، چې د امریکایي کارکوونکو پر وړاندې یې د ظلم او تېري تګلاره غوره کړې او اوس هڅه کوي چې غبرګون وښيي، لویه تېروتنه کوي.»
هغې وویل: «چینایان غواړي هوکړه وکړي، خو نه پوهېږي چې دا کار څنګه وکړي.»
تر دې وړاندې، د سې شنبې په ورځ، بیجینګ خبرداری ورکړی و که چیرې ټرمپ د چین پر ټولو وارداتو ۵۰ سلنه اضافي تعرفه ولګوي، «تر پای به وجنګېږي.»
د نړۍ د دوو سترو اقتصادونو ترمنځ سوداګریز جنجال نور هم ژور شوی، او دواړو خواوو تر اوسه خبرو اترو ته لږه نښه ښکاره کړې ده.