تاند (پنجشنبه، د وري/ حمل ۱۴مه) امریکايي خپرونې، لانګوار ژورنال په یوه شننه کې کښلي، داسې ښکاري چې د امریکا د متحدو ایالتونو ولسمشر ډونالډ ټرمپ له طالبانو سره د تعامل په اړه خپلې پخوانۍ پالیسۍ ته دوام ورکوي، هغه پالیسي چې د دوحې تړون ته یې لاره هواره کړه.
دا نشریه لیکي، د امریکا د بهرنیو چارو وزارت له خوا د سراجالدین حقاني د نیولو لپاره د ۱۰ میلیون ډالرو جایزې لیرې کېدا او د افغانستان صحنې ته د زلمي خلیلزاد بیرته راګرځېدا، د همدې پالیسۍ نښې دي.
د راپور له مخې، د طالبانو له لوري د یوه بل امریکايي له خوشي کېدو سره هممهاله د حقاني شبکې د دریو جګپوړو غړو پر سر جایزې لغوه شوې.
لانګوار ژورنال ټینګار کړی چې د حقاني شبکې پر غړیو د جایزو لرې کېدا، د سراجالدین حقاني د رسميت پېژندلو پر لور یوه بله هڅه ده.
امریکا په افغانستان کې د حضور په کلونو کې سراج الدین حقاني او د هغه شبکه تر ټولو خطرناکه جنګیالۍ ډله بلله.
په دې تحلیل کې دا هم ویل شوي چې سراجالدین حقاني، چې د امریکايي افسرانو، جنرالانو، او نیویارک ټایمز له لوري د “منځلاري” په توګه انځور شوی، تېر دوبی له کوم څرګند دلیل پرته متحده عربي اماراتو او سعودي عربستان ته سفر وکړ، سره له دې چې د FBI د تعقیب په لیست کې شامل و.
لانګوار ژورنال زیاتوي چې د ټرمپ اداره لومړۍ امریکايي اداره نه ده چې د یرغمل نیونې پر بنسټ ډیپلوماسي پر مخ بیايي او ترهګرو ډلو ته امتیازات ورکوي. خو دا ګام ښايي حقاني شبکه، چې د تېرو دوه لسیزو په اوږدو کې یې ګڼ امریکایان او لویدیځ اتباع تښتولي، لا پسې زړه وره کړي.
په دې تحلیل کې دا هم راغلي چې له طالبانو سره د ټرمپ د ادارې د معاملو دوام دا ښيي چې طالبان د القاعدې او نورو ترهګرو سازمانونو د ملاتړ د برابرولو په برخه کې هېڅ حساب نه ورکوي.