تاند (چهارشنبه، د وري/ حمل ۱۳ مه) نن سهار (چهارشنبه) د افغانستان او بلوچستان ترمنځ د دیورند کرښې د دواړو خواوو سیمو اوسېدونکو د زلزلې قوي ټکانونه احساس کړل، چې د خلکو په منځ کې یې ویره او وارخطايي رامنځته کړه.
د ټکانونو له امله، د ژوب او شاوخوا سیمو خلک له خپلو کورونو او ودانیو څخه بهر راووتل.
د پاکستان د زلزلهپېژندنې ملي مرکز د معلوماتو له مخې، د زلزلې شدت د ریښتر په کچه ۵.۰ درجې و او ۶۵ کیلومتره ژوره وه. د دې زلزلې مرکز د افغانستان د هندوکش په غرنیزه سیمه کې موقعیت درلود.
که څه هم د زلزلې ټکانونه قوي وو، تر اوسه د مرګژوبلې یا مالي زیان راپور نه دی ورکړل شوی. خو ناڅاپي ټکانونو د سیمې خلک وېرولي، چې د بلې زلزلې اندېښنه هم لري.