تاند【شنبه د حمل ـ وري ۲مه】د مارچ ۲۲مه د اوبو نړیواله ورځ نومول شوې ده.
سور صلیب د دغې ورځې په مناسبت وايي، افغانستان کې ۳۳ میلیونه خلک د اوبو له کمښت سره مخ دي.
یادې نړیوالې کمېټې زیاته کړې چې افغانان د څښاک پاکو او کرنې لپاره کافي اوبو ته لاسرسی نه لري.
سرچینې د څښاک او پخلي پاکو او کرنې لپاره کافي اوبو ته لاسرسی مهم بللی او ټینګار یې کړی، چې د افغانانو پر روغتیا او اقتصادي پرمختګ اغېز کوي.
افغانستان کې د اوبو کمښت ستونزه داسې مهال بحراني یادېږي، چې په ګڼ شمېر ولایتونو او لویو ښارونو کې د اوبه کچه ټیټه شوې او خلک عملاً د څښاک پاکو اوبو ته لاسرسی نه لري.
په وروستیو کلونو کې اقليمي بدلون او په زیاته اندازه له ځمکو د دوامداره اوبه رایستل هېواد کې د پاکو او کرنې اوبو کمښت لامل ګڼل کېږي.
عام افغانان د پاکو اوبو او د کرنې لپاره اوبو ایستلو د معیاري سیستمونو برخه کې له نړیوالو سازمانونو د مرستې غوښتنه کوي، څو د اوبو کمښت ستونزه حل شي.
بل لورته بیا یو شمېر نور افغانان پر افغانستان حاکم نظامونه ګرموي او وایي، د دوی د بې پروایئ له امله افغانستان په شته اوبو کې د اوبو له کمښت سره مخ دی.
دنظرخاوندان وایي که د افغانستان سیندونه مهار او منظم اوبیزسیستم ته وکارول شي نو یاده ستونزه حل کېدای شي.