تاند【پنجشنبه د کب ـ حوت ۳۰مه】رویټرز خبري آژانس د سپینې ماڼۍ د څرګندونو له مخې راپور ورکړی، چې د امریکا ولسمشر ډونالډ ټرمپ به نن (پنجشنبه) د پوهنې وزارت د تړلو یو اجرائیوي فرمان لاسلیک کړي.
سرچینه وایي ټرمپ او د هغه میلیاررر سلاکار ایلان ماسک هڅه کړې، چې حکومتي پروګرامونه او ادارې لکه د امریکا د نړیوالې پراختیا ادارې وتړي.
خو د پوهنې وزارت تړل به د کابینې پر کچه د ټرمپ لومړۍ هڅه وي.
د ولسمشر ټرمپ د خبرو له مخې؛ د دې وزارت شتون یوه ولسي دوکه ده.
نوموړی وایي، دغه اداره د زدکوونکو په سمه روزنه کې پاتې راغلې ده.
د معلوماتو له مخې ویل کیږي، چې د پوهنې وزارت د کانګرس له منظورۍ پرته نشي تړل کېدای.