تاند【پنجشنبه د کب ـ حوت ۳۰مه】د طالبانو د حکومت تر واک لاندې افغانستان بانک وايي، چې د برښنايي تادیاتو د ترسره کولو لپاره يي نوی سیستم جوړکړی دی.
یاد بانک زیاتوي، چې له دې وروسته به د طالبانو د حکومت ټولې عایداتي اداري له دې سیستم سره تر نښلېدو وروسته برښنايي تادیات ترسره کوي.
د افغانستان بانک مسوولانو ویلي، چې د دې سیستم له لارې به د هېواد ټول عواید له روڼتیا، سرعت او مصوونیت سره د ماليي وزارت یوه واحد ادرس ته راټولیږي.
سرچینه زیاتوي، چې د مالي تادیاتو دا نوی سیستم به د ماليي وزارت له مالي سیستمونو سره وصل او د هېواد ټولې عایداتي ادارې او د دولتي مامورینو د معاشونو د اجرا لړۍ به له دې سیستمونو څخه پیل شي.
د سرچینې په وینا؛ په نوي تادیاتي سیستم کې د تادیاتو ټول نړیوال معیارونه په نظر کې نیول شوي دي.
د معلوماتو له مخې، د دې سیستم د عملي چارو د پراختیا لپاره د افغانستان بانک او ماليي وزارت ترمنځ هوکړه هم لاسلیک شوه.