آصف بهاند

ستاسو د وطن د عدالت په تله کې او ستاسو د وطن د شریعت په دایره کې زما د قاتلینو محکمه تر کوم ځای پورې ورسیده؟؟؟

        (فرخنده)

دا دی بیا د فرخندې تلین دی، لسم تلین او زموږ واکداران، د شریعت لارویان او… هېڅوک ونه توانېدل چې د فرخندې قاتلین او سوځونکي راپیدا او د عدالت منگولو ته وسپاري. دا خو لا پرېـږده چې د فرخندې د وهلو، وژلو او سوځولو پېښه ټولو هېوادوالو او نړیوالو په خپلو سترگو ولیده، خو خلک داسې هیرجن دي چې اوس هغه سوځ،ل شوې فرخنده، د هغې د تلین په ورځ هم څوک نه یادوي.

که د افغانستان د مظلمو ښځو کوم خواخوږی فانتازي وکړي او ووايي چې: ما تېره شپه فرخنده په خوب ولیده، بدن یې هماغسې په وینو لړلی و، په ټیټ او گیله‌من غږ یې راته وویل: ستاسو د وطن د عدالت په تله کې او ستاسو د وطن د شریعت په دایره کې زما د قاتلینو محکمه تر کوم ځای پورې ورسیده؟؟؟

نو د افغانانو ځواب څه وي؟

دا په یاد ولرئ چې د فرخندې د نازک بدن په وینو لړلې ټوټې د وروسته پاتې خرافي جاهلې ټولنې د نا پوهۍ په اور پخې شوې، دا پوخ شوی تخم وکرل شو، نا څاپه یې د ظلمونو په همدې پسرلی کې غوټۍ وکړې، غوټۍ یې وغوړیدې او په غوړیدو سره یې د پوهې او نا پوهۍ، د خرافاتو او علم په منځ کې د برید کرښه را کش کړه، د ظلم له اور نه د راټوکیدلو ګلانو هره پاڼه یې د نا پوهۍ، ناروا او ظلم ستوني ته تیره تیغ شو او دا تیره تیغ به تر ډیرو پورې د نا پوهۍ او ظلمونو مخ کې د سپر په څیر ولاړ وي.

دا غمیزه پای نه‌لري، کېدای شي د ځینو خلکو هېر هم شي، خو تاریخ یې تصویرونه همداسې په وینو لړلی په خپل زړه کې ساتي او دا البوم به کله کله راتلونکو نسلونو ته ورښیي.

د اوس له پاره د فرخندې د لسم تلین د درناوي په خاطر بیا زما څو پخوانۍ جملې او یوټوټه پخوانی شعر:

څو جملې:

د فرخندې د وینو په بیه،

د فرخندې د کباب شوي بدن په بیه،

او د فرخندې د ژوند په قیمت سره، د ټولنې چیز فهمه خلک باید پوه شي چې زموږ د ټولنې فکري سطحه په کومه پوړۍ کې ده. د فرخندې د وینو هر سورڅاڅکی زموږ د ټولنې د انسانیت پر تندي باندې تور داغ دی.

دا هم زما شعر:

عرض

آهای !!!

د لوړو کلو خلکو،

غږ مې در رسي که نه؟

دغه دی چغې وهم

وژني مې،

وهي مې،

سوځوي مې

خلاصولای مې شئ؟؟؟

۲۰/۰۳/۲۰۱۵

هیدرسلیف، ډنمارک

آصف بهاند