تاند【چهارشنبه د کب ـ حوت ۲۹مه】ننګرهار کې د طالبانو مرستیال والي ویلي، چې د تورخم دروزاه به نن ماسپښین د هر ډول تګ راتګ لپاره پرانېستل شي.
د تورخم پرانېستل کېدو په تړاو پاکستاني لوري د طالبانو له کمیسار عبدالجبار حکمت سره خبرې کړې دي.
تراوسه د دواړو لورو ترمنځ د منل شویو شرایطو په تړاو څه نه دي ویل شوي خو له دې وړاندې د طالبانو حکومت ادعا کړې وه چې، پاکستان ترې غواړي د فرضي کرښې دې غاړې نظامي تاسیسات جوړ نه کړي.
یو شمېر پاکستاني رسنیو بیا راپور ورکړی، چې طالبان غواړي د تورخم بازار د مومندرې ولسوالۍ ډکې سیمې ته انتقال کړي.
رسمي سرچینو د بازار د انتقال په اړه لا څه نه دي ویلي.
تورخم له کابو یوې میاشتې راهیسې د هر ډول تګ راتګ پر مخ پاکستاني لوري تړلې ده.
د دې لارې د تړل کېدو له امله سوداګرو ته ملیونونه ډالر زیان اوښتی دی.