تاند【دوشنبه د کب ـ حوت ۲۷مه】د طالبانو د حکومت ریاست الوزراء اداري مرستیال مولوي عبدالسلام حنفي په مشرۍ د کډوالو ستونزو ته د رسېدنې عالي کمېسیون غونډه کې د کډوالو پر ستونزو غونډه وکړه.
د طالبانو تر واک لاندې ارګ ویلي چې، دې غونډه کې د کډوالو ستونزو ته د رسېدنې برخه کې د کمېټو فعالیتونو په لا ګړندي کېدو ترڅنګ کډوال سوداګرو ته په کور دننه د اسانتیاوو او د پانګونې فرصتونو په برابرېدو ټینګار وشو.
سرچینه زیاتوي چې په دې غونډه کې پر ګاونډیو هېوادونو غږ وشو، چې د کډوالو بېړني او جبري اېستلو څخه دې ډډه وکړي او د دواړو هېوادو په همغږۍ د یوه ګډ میکانیزم له مخې باید کډوال هېواد ته را ولېږدول شي.
یاد کمېسیون د کډوالو نړېوال سازمان، ملګرو ملتونو، اروپایې ټولنې او نورو نړېوال بنسټونو غوښتي، چې د افغان کډوالو ستونزو ته ځانګړې پاملرنه وکړي، څو ګاونډیو هېوادونو د چارواکو د عاجلانه او ناعادلانه پرېکړو له کبله د هغوی حقوق پایمال او زیاتی ورسره ونه شي.
په غونډه کې پرېکړه شوې، چې خپلو امکاناتو ته په کتو به هڅه وکړي کډوالو ته په خپل کور کې د هوسا ژوند زمینه برابر کړي.
دا غونډه داسې مهال ترسره کېږي چې، بل لورته د خېبر پښتونخوا اعلی وزیر، علي امین ګنډاپور هم د افغان کډوالو په اړه د پاکستان پر پالیسۍ نیوکه کړې ده.
نوموړي ټینګار کړی چې، دوی باید په جبري ډول له پاکستانه ونه ایستل شي.
پاکستانی په ټینګار سره ویلي چې د مارچ تر ۳۱مې وروسته به له پاکستانه ټول غیرقانوني کډوال وباسي.