تاند【شنبه د کب ـ حوت ۲۵مه】د طالبانو حکومت د تاجکستان او قرغیزستان ترمنځ د سرحدي نښو ټاکلو او لاسلیک شوي تړون هرکلی وکړ.
د طالبانو بهرنیو چارو وزارت په یوه خبرپاڼه کې ویلي چې، دوی د اوږدمهاله سرحدي اختلاف د تفاهم له لارې حل کول، د سیمې د ثبات، اقتصادي پرمختګ او متقابل باور د پیاوړتیا برخه کې یو مثبت ګام بولي.
په خبرپاڼه کې راغلي: « افغانستان تل د سولې، تفاهم او سیمهییزو همکاریو د پراختیا ملاتړ کړی او باور لري چې دا تړون به د مرکزي آسیا لپاره د پایدارې سولې او همکاریو یو نوی فصل پرانیزي.»
سرچینه زیاتوي چې تاجکستان او قرغیزستان د دوو کلونو خبرو اترو او مذاکرو وروسته، د خپلو سرحدي کرښو د تثبیت او نښه کولو لپاره یو تړون لاسلیک کړی دی.
تاجکستان او قرغیزستان د مرکزي آسیا دوه ګاونډي هېوادونه دي، چې دواړه د شوروي اتحاد له ړنګېدو وروسته خپلواکي ترلاسه کړې.
د دې دوو هېوادونو ترمنځ اړیکې تل د سرحدي شخړو او اوبو د ویش پر سر له ستونزو سره ملې وې، خو په وروستیو کلونو کې یې د سولې او تفاهم هڅې کړي دي.