تاند【شنبه د کب ـ حوت ۲۵مه】د ملګرو متلونو سرمنشي انتوني ګوترېش وايي، نړۍ کې د مسلمانانو پر وړاندې تعصب په بې ساري ډول زیات شوی دی.
نوموړي، اسلام څخه د کرکې یا اسلاموفوبیا پر وړاندې د مبارزې نړیوالې ورځې په مناسبت دا خبرې کړې دي.
ګوترېش پر ایکسپاڼه په یوه پيغام کې له نړۍ غوښتي، چې د برابرۍ، بشري حقونو او انساني کرامت د ساتنې لپاره سره ګډ کار وکړي.
دغه راز اسلاموفوبیا سره د مبارزې نړیوالې ورځې په مناسبت د اسټرالیا لومړي وزیر ټینګار کړی، چې هېواد یې د مسلمانانو پر ضد هر ډول کرکې او دښمنۍ سره مبارزه کوي.
له دې وړاندې کاناډا هم له اسلام څخه د کرکې پر وړاندې د مبارزې لپاره یوه استازې ټاکلې ده.
د رسنیو د معلوماتو له مخې په ټوله نړۍ کې هېڅ هېواد په رسمي ډول د اسلاموفوبیا ملاتړ نه کوي، خو فرانسه، امریکا، هند، چین او یو شمېر نور هغه هېوادونه دي، چې ویل کېږي د مسلمانانو پر وړاندې د کرکې او تعصب ملاتړ کوي.
د اسلاموفوبیا ضد نړیواله ورځ هر کال د مارچ ۱۵مه نېټه نمانځل کېږي.