افغانستان له پاکستان سره اوږده ګډه فرضي کرښه لري چې د دې کرښې په اوږدو کې په پرتو ولایتونو کې د تګ راتګ یو شمېر رسمي او غېرې رسمي بندرونه شته . د دغو ځمکنیو بندرونو په منځ کې تر ټولو مهم تورخم او سپين بولدک دي او ترڅنګ يې غلام خان، انګور اډه، خرلاڅۍ او ځينې نورې لارې د تجارتي مالونو او په ځينې وختونو کې په ټوکن د خلکو د اوښتو او را اوښتو لپاره کارول کيږي.
نژدې شل ورځې کيږي، چې د تورخم لاره د دواړو لوريو د ترينګلو اړيکو او وخت ناوخت نښتو په وجه بنده ده، چې ګڼ مساپر دواړو لورو ته بند پاتې دي او د ميليونونو په ارزښت تجارتي اموال په موټرو کې خراب شوي او يا خرابيدونکي دي.
له پاکستان څخه اوس مهال افغانان د سپين بولدک ترڅنګ پر غلام خان بندر اوړي، چې پاکستان لوری ورته ټاپه وهي او د افغانستان طرف ته دا اسانتيا نشته.
غلام خان بندر کابل ته د نورو بندرونو په نسبت لسګونه کيلومتره لنډ دی، چې له دې فرصته بايد ګټه واخېستل شي او د رسمي ترانزیټ کارونه يې وشي.
په دې وروستيو کې د افغان او پاکستاني پوله ساتو ترمنځ وخت ناوخت په مختلفو موقعیتونو کې نښتې کيږي، چې د دواړو لورو عوامو ته پکې زيان اوړي، ناروغان بند پاتې کيږي او سوداګر مالي زيانونه ويني.
که غلام خان د رسمي بندر په توګه فعال او افغان لوری د دخول او خروج اسانتياوې برابرې کړي، نو تر ډېره حده د وګړو ستونزې ورسره کميدلی شي، چې په دې توګه غلام خان بندر د تورخم او سپين بولدک غوره بديل دی.