تاند (دوشنبه، د تلې/ میزان ۲۸ مه) د طالبانو د حکومت دفاع وزیر محمدیعقوب مجاهد په یوه تلویزیوني مرکه کې د کابل او اسلاماباد ترمنځ په دوحه کې د ترکیې او قطر په منځکړتوب د اوربند د موافقې په اړه ټینګار وکړ چې دا موافقه د نړیوالو منځګړیو هېوادونو په ضمانت شوی او د ماتېدو لپاره یې نور هېڅ ځای نه شته.
هغه د دې پوښتنې په ځواب کې چې «څه ضمانت شته چې پاکستان به بیا برید ونه کړي؟» وویل: «هغوی د قطر او ترکیې په حضور کې ژمنه کړې ده. که بیا برید وکړي، افغانستان به متقابل اقدام وکړي.»
دفاع وزیر وویل، د موافقې له مخې به د دواړو هېوادونو سوداګري اړیکې بېرته عادي حالت ته راګرځي او د افغان کډوالو موضوع هم د خبرو برخه وه.
ښاغلي مجاهد زیاته کړه: «موږ پر دې ټینګار وکړ چې له پناه غوښتونکو سره باید انساني چلند وشي.»
د افغانستان حاکمیت د معاملې وړ نه دی
ښاغلي یعقوب مجاهد له دې جلا په نورو څرګندونو کې د پاکستان د اندېښنو په اړه چې د کابل او نويډیلي د اړیکو په اړه یې کړې وې، وویل: «افغانستان د یوه خپلواک هېواد په توګه حق لري له هر هېواد سره اړیکې ولري، او هېڅوک باید زموږ د بهرني سیاست د سانسور هڅه ونه کړي. هېڅوک دا جرات نه لري چې د هند اړیکې زموږ پر وړاندې د بحث موضوع وګرځوي.»
په افغانستان کې د طالبانو له واک ته رسېدو وروسته پاکستاني چارواکو، په تېره بیا پوځ توقع لرله چې دوی به د هند په براعظمګي کې د انګرېزانو د استعمار د مهال په شان د افغانستان بهرنۍ پالیسي دېکته کوي.
دفاع وزیر ښاغلي مجاهد د ډیورند کرښې په اړه وویل چې دا موضوع د دوحې په تړون کې نه ده شامله شوې، او پرېکړه کول یې «د افغانستان د خلکو واک» دی.
قطر، چې د خبرو اترو کوربه او منځګړی و، په خپل سر د اوربند په موافقه کې د افغانستان او پاکستان ترمنځ د ډریوند فرضي کرښې ته د «پولې» کلمه کارولې وه، خو وروسته یې اصلاح کړه.
د طالبانو د بهرنیو چارو وزارت مشاور: دا یو دیپلوماټیک بری دی
په ورته وخت کې د طالبانو د بهرنیو چارو وزیر سلاکار، ذاکر جلالي، د دوحې د اوربند موافقه د «افغانستان دیپلوماټیک بری» وباله او ویې ویل: «پاکستان د منځګړیو په حضور کې ومنله چې له دښمنانه کړنو او د مخالفو ډلو له ملاتړ څخه ډډه وکړي؛ دا د کابل د اصولي دریځ یو ځل بیا تائید دی.»
د طالبانو حکومت تور لګوي چې پاکستان په خپله خاوره کې داعش ته پناه ورکړې چې د افغانستان ترڅنګ په نورو هیوادونو کې تروریستي بریدونه وکړي خو پاکستان بیا ادعا کوي چې افغانستان ټي ټي پي ته پناه ورکړې چې د افغانستان له خاورې د پاکستان پر ضد کار واخلي. د طالبانو حکومت په ځلونو د پاکستان دا ادعا رد کړې ده.
د دوحې خبرې د پاکستان او د طالبانو د حکومت د استازو تر منځ د اوربند، د سوداګریزو لارو د پرانیستې، او د امنیتي ادعاوو د څېړلو لپاره د ګډ میکانیزم د جوړېدو په هدف ترسره شوې.
ټاکل شوې ده چې د خبرو بل پړاو د اکتوبر په ۲۵مه په استانبول کې ترسره شي.