تاند【شنبه د کب ـ حوت ۱۸】پاکستاني پولیسو د دغه هېواد په پلازمېنه اسلام اباد او راولپېنډۍ کې سلګونه افغانان چې ځینې یې “پي او ار” کارتونه هم لري نیولي او، اسلام اباد کې د کډوالو یوه پنډغالي ته لېږدولي دي.
یوه افغان کډوالو رسنیو ته ویلي چې، اسلام اباد او راولپېنډۍ کې د “پي او ار” کارت لرونکي افغانان په ناقانونه توګه نیول کیږي.
ټاکل شوې دغه کډوال په جبري توګه له پاکستانه و ایستل شي.
له دې سره هممهاله کراچۍ ښار کې د طالبانو د حکومت سرکونسل مولوي عبدالجبار تخاري ویلي، د دې قونسلګري مسئولینو په هڅو یې ۱۲تنه افغانان د سند ایالت له زندانو راخوشي کړي دي.
تخاري زیاته کړې چې، خوشي شوي کسان د چمن له لارې بیرته هېواد ته ولېږدول شول.
نوموړي زیاته کړې، تېرو درېیو میاشتو کې یې د دوو ښځو اوو ماشومانو په ګډون ۶۲ افغانان د سند ایالت له بېلابېلو زندانو راخوشې او هېواد ته ستانه کړي دي.
د سلګونه کسانو د نیول کېدو او ۱۲ تنو د خوشې کېدو خبر داسې مهال خپرېږي چې، د پاکستان د کورنيو چارو وزارت له ټولو “غيرقانوني بهرنيو اتباعو” او د (ایسي سي) کارت لرونکو څخه غوښتنه کړې چې تر ۳۱ مارچ مخکې دې له دې هېواده ووځي.
دغه وزارت په يو خبرپاڼه کې، چې پرون (جمعه، د حوت ۱۷مه) خپره شوې، خبرداری ورکړی چې که دا کار ونشي، نو د اپرېل له لومړۍ نېټې څخه به د دوی د شړلو بهير پيل شي.