تاند (شنبه، د کب/ حوت ۱۱ مه) د ایران د سوداګرۍ یو چارواکی وايي، د افغانستان او ایران ترمنځ هره ورځ تر ۲ زره ډېر باري موټرونه سوداګري مالونه لېږدوي، چې دا د موټرچلوونکو او سوداګرو لپاره د ویزو د ساده او چټک صدور اړتیا روښانه کوي.
محمد عماتې، چې د رضوي خراسان ولایت د سوداګرۍ خونې د مشرتابه پلاوي غړی دی، د سوداګرۍ د بهرني ملاتړ پر اهمیت ټینګار وکړ. هغه وویل: «د بهرنیو چارو وزارت استازي باید د ایراني اتباعو او سوداګرو فعال ملاتړ وکړي.»
د ایران د دولتي راډیو او ټلوېزیون (IRIB) د راپور له مخې، نوموړي زیاته کړه چې رضوي خراسان د ایران په سیمهییز تجارت کې مهم رول لري، ځکه چې د منځنۍ آسیا هېوادونو ته د سړک له لارې ۸۰ سلنه صادرات د همدې ولایت د ترانسپورټي شرکتونو په وسیله کېږي. له ۱۰,۰۰۰ څخه زیات موټرونه د دې سیمې د نړیوال ترانسپورټ په شرکتونو کې فعالیت کوي.
د عماتې په وینا، د ایران او افغانستان ترمنځ سوداګري د دریو سرحدي لارو له لارې ترسره کېږي، او یوه بله لار ایران له ترکمنستان سره نښلوي. خو هغه د موټرچلوونکو د ستونزو په اړه اندېښنه څرګنده کړه، ویې ویل چې قونسلګرۍ له ترانسپورټي سکتور سره د مؤثرې اړیکې په ټینګولو کې پاتې راغلي دي.
احمد زمانیان، چې د مشهد د سوداګرۍ خونې د ترانسپورټ، ترانزیت، او سرحدي چارو کمیسیون مشر دی، هم دا اندېښنې تائید کړې. هغه خبرداری ورکړ چې ناڅاپي بدلونونه د موټرچلوونکو لپاره جدي خنډونه جوړوي.
زمانیان وویل:«یوه له لویو ستونزو څخه دا ده چې د ترانسپورټ د قوانینو او مقرراتو پلي کېدل له مخکې نه اعلانېږي، چې دا چاره د ترانسپورټي شرکتونو عملیات پیچلي کوي.»
هغه د اقتصادي همکاریو سازمان (ECO) د غړو هېوادونو د ترانسپورټ له وزیرانو وغوښتل چې داسې پالیسي جوړه کړي چې د باروړونکو موټرو د ترانسپورټ مقررات ثابت وساتي، د ترانزیت لګښتونه کم کړي، او د خصوصي سکتور ستونزې کمې کړي.
حاضردمه ایران د افغانستان تر ټولو ستر سوداګري شریک دی. خو په دې شراکت کې لویه برخه افغانستان ته د ایران د صادراتو ده.