تاند(شنبه، د کب/ حوت ۱۱ مه) ۸۲ افغانې محصلینې د امریکا د مالي مرستو د بندیدو له امله له عمان څخه د ایستلو له ګواښ سره مخامخ دي.
په عمان کې ۸۲ افغانې محصلینې د امریکا د نړیوالې پراختیايي ادارې (USAID) د بورسونو او مالي مرستو د بندیدو له امله افغانستان ته د بیرته ستنیدو له خطر سره مخامخ شوې دي.
دا محصلینې، چې د ۲۰۲۴ کال په وروستیو کې د ښځو د بورسونو بنسټ (WSA) په ملاتړ د عمان د مینځني ختیځ کالج (Middle East College) ته انتقال شوې وې، وايي چې د امریکا د حکومت د تازه پالیسیو له امله، د دوی مالي ملاتړ قطع شوی او اوس د اخراج او شړلو له خطر سره مخامخ دي.
محصلینو: که افغانستان ته وشړل شو، ژوند او تعلیم مو له خطر سره مخامخ دی
محصلانو په خپل لیک کې ټینګار کړی چې که افغانستان ته جبراً واستول شي، د طالبانو له خوا د نجونو پر زده کړو سخت محدودیتونه او امنیتي تهدیدونه به یې ژوند او زده کړې له جدي خطر سره مخامخ کړي.
دوی د امریکا له سفارت څخه عاجله غوښتنه کړې چې د دوی د امنیت د خوندي کولو او د زده کړو د دوام لپاره حل لاره ومومي.
له نړیوالې ټولنې څخه د محصلانو غوښتنه
محصلانو له نړیوالې ټولنې، په ځانګړي ډول له امریکا څخه غوښتي چې د دوی ستونزې ته جدي پام وکړي او افغانستان ته یې د جبري ستنولو مخنیوی وکړي. دوی باور لري چې زده کړې یې نه یوازې د شخصي ودې لپاره مهمې دي، بلکې د افغانستان د راتلونکي لپاره هم حیاتي ارزښت لري.
د امریکا د مرستو ځنډ او نړیوال بحران
د ډونالډ ټرمپ په مشرۍ د امریکا حکومت، اعلان کړی چې د USAID مالي مرستې به تر هغې بندې وي، چې له نوو پالیسیو سره د مرستو د سمون لپاره بشپړه ارزونه ترسره شي.
د دې پرېکړې له امله، د USAID نړیوال فعالیتونه درول شوي، او له دې کبله په ټوله نړۍ کې د خوراکي، طبي، او بشري مرستو بهیر ګډوډ شوی دی.
د افغان محصلانو لپاره یو حیاتي وضعیت
دغه افغانې محصلانې اوس له یو ناوړه او برخلیک ټاکونکي وضعیت سره مخامخ دي. د امریکا د مالي مرستو د بندیدو له امله، دوی د اخراج او افغانستان ته د جبري ستنولو له خطر سره مخامخ دي، چېرې چې د طالبانو محدودیتونه د دوی تعلیمي راتلونکی ګواښي.
د نړیوالو بشري حقونو غوښتنه: زده کړه بنسټیز حق دی
نړیواله ټولنه باید په بېړني ډول د دې محصلانو د ساتنې او د زده کړو د دوام لپاره اقدام وکړي. که دوی ته د زده کړو دوام یقیني شي، د افغانستان د ثبات او پرمختګ لپاره به راتلونکې رهبرانې وروزل شي.
زده کړه د هر انسان بنسټیز حق دی، او باید هڅې وشي چې دې محصلانو ته له خپلو استعدادونو څخه د کار اخیستلو فرصت ورکړل شي.