تاند (شنبه، د کب/ حوت ۴ مه) نهه غیرقانوني افغان کډوال، چې مالیزیا ته روان وو، او درې تايلندي قاچاقبران د شنبې په ورځ په جلا جلا عملیاتو کې د تايلند په جنوبي ولایتونو کې ونیول شول.
د کډوالو چارو پولیسو، د ۹مې حوزې ولایتي پولیسو، او د سیاحتي پولیسو یو موټر د سونګکلا ولایت د هات یای ولسوالۍ په کوان لوانګ سیمه کې د کثافاتو مرکز ته نژدې ودراوه.
په موټر کې دوه تنه تایلندیان – ویناسوري اروی (۳۴ کلن) او نوراسیلا جورلو (۳۱ کلنه) ونیول شول. له دې سره څلور افغان غیرقانوني کډوال هم، چې د موټر په بکس کې ناست وو، ونیول شول. ټول نیول شوي کسان د هات یای د پولیسو حوزې ته ولېږدول شول.
په بله چاپه کې، پولیسو نیمای مائیروګاکي (۴۱ کلن)، چې یو تايلندی دی، او پنځه افغان کډوال د پتاني ولایت د نونګ چیک ولسوالۍ په مورکینګ سړک کې ونیول. ټول کسان د نونګ چیک د پولیسو حوزې ته ولېږدول شول.
دری واړه تايلندي اتباع د غیرقانوني کډوالو د پټولو او له نیولو څخه د هغوی د تښتولو په تور تورن شوي دي.
دوو نیول شويو موټرچلوونکو، پولیسو ته ویلي، چې یوه مالیزیايي وګړي دوی ته د هر مسافر پر سر ۳,۰۰۰ بات ورکړي وو، تر څو افغانان له سونګکلا څخه د ناراتیوات د سرحدي ولسوالۍ سونګای کولوک ته انتقال کړي.
د څېړنو له مخې، دا نهه افغان کډوال له کمبودیا څخه د غیرقانوني سرحدي لارو څخه تايلند ته داخل شوي وو. هغوی ویلي چې د قاچاقبرانو له لارې یې هر یوه یې ۱۲۰,۰۰۰ بات ورکړی و، چې د مالیزیا ته د تګ زمینه برابره کړي.
ټول نیول شوي کسان د قانوني اجراآتو لپاره د پولیسو په ولکه کې دي.