تاند (پنجشنبه، د کب/ حوت ۲ مه) د کرکټ اتلانو اتلولۍ/ چمپینز ټرافي د اې ګروپ په دوهمه سیالۍ کې نن هندوستان په ۶ ویکټونو او ۲۱ توپونو بنګله دېش ته ماته ورکړه.
په دې سیالۍ کې، چې په متحده عربي اماراتو کې وشوه، لومړی بنګله دېش توپ وهنه / بیټنګ وکړ خو ټول لوبغاړي یې په ۴۹ اور کې په داسي حال کې وسوځېدل چې ۲۲۸ منډې یې کړې وې.
هندي لوبغاړي محمد شامي ۵، هرشیت رانا ۳ او اکسر پټیل ۲ لوبغاړي وسوځول.
د بنګله دېش لپاره توحید هردوی ۱۰۰ او جاکر علي ۶۸ منډې وکړې. اکثره نور بنګالي لوبغاړي ژر – ژر وسوځېدل.
خو د هند لپاره بیا پیلګر لوبغاړي شوبمن ګیل ۱۰۱ ناسوځېدلې منډې وکړې. ګیل په وروستي یو کال کې ډېر په ښه فورم کې دی. نوموړی د دې سیالۍ غوره لوبغاړی هم وپېژندل شو.