تاند (دوشنبه، د سلواغې/ دلوې ۲۹ مه) د ایران د بهرنیو چارو وزیر د یکشنبې په ورځ وویل چې تهران او ډیلي د چابهار بندر لپاره د همکارۍ ۱۰ کلنه موافقه لاسلیک کړې او دواړه هېوادونه د دې همکارۍ پر دوام ټینګار کوي.
عباس عراقچي وویل، هند به له امریکا سره مشوره وکړي، څو د چابهار بندر د معافیتونو د دوام امکان وسنجوي.
د ولسمشر ټرمپ ادارې په وروستیو ورځو کې وویل چې د امریکا له بندیزونو څخه د ایران چابهار بندر د معافیت به پای ته ورسوي.
د امریکا مخکینیو حکومتونو د افغانستان له جمهوري حکومت سره د مرستې په خاطر د ایران چابهار بندر د امریکا له بندیزونو استثنا کړی و.
د ایران د ایسنا خبري آژانس د راپور له مخې، د ایران د بهرنیو چارو وزیر چابهار بندر د ایران لپاره مهم وباله او ویې ویل چې د ایران اسلامي جمهوریت او هند په دې بندر کې د همکاریو د دوام لیوالتیا لري.
هغه زیاته کړه:
«چابهار د هند سمندر ته یو مهم بندر دی، چې ایران او هند سره نښلوي.»
د روان کال د ثور په ۲۴مه، ایران او هند د چابهار بندر د پراختیا او مدیریت لپاره یو لس کلن تړون لاسلیک کړ.
دواړو هېوادونو په یوه ګډه اعلامیه کې وویل چې د دې اوږدمهاله تړون موخه د سیمهییزو اړیکو پراختیا او سوداګري اسانتیاوې دي، په ځانګړې ډول د هند، ایران او افغانستان ترمنځ.
د بندر د معافیتونو د لغوه کېدو امکان
د ایران د بهرنیو چارو وزیر د امریکا له بندیزونو څخه د چابهار بندر د معافیتونو په اړه وویل:
«موږ پوهېږو چې هندي چارواکي له امریکایانو سره مشوره کوي، نو دوی ته ازادي ورکوو چې خپله پرېکړه وکړي.»
د امریکا د بندیزونو له امله، هند د واشنګټن له اجازې پرته د ایران په لویو پراختیايي پروژو کې برخه نه شي اخیستلی.
د هندۍ ورځپاڼې “ټایمز آف انډیا” د راپور له مخې، سپینې ماڼۍ د امریکا د بهرنیو چارو وزارت ته لارښونه کړې، چې د ایران د بندیزونو معافیتونه، په ځانګړې توګه د چابهار بندر په تړاو، یا تعدیل کړي او یا یې لغوه کړي.
چابهار د افغانستان لپاره ستراتیژیک اهمیت لري.
هند د چابهار بندر افغانستان ته د تجارتي توکو د لېږد او له منځنۍ آسیا سره د سوداګریزو اړیکو د پراخولو لپاره مهم ګڼي.
دا بندر د افغانستان لپاره په دې خاطر ډېر مهم دی چې د پاکستان پر بې باوره ترانزیتي او بندري لارو یې اتکا کمېږي.