تاند【یکشنبه د سلواغې ـ دلوې ۲۸مه】د پاکستاني رسنیو د راپورونو له مخې، د خېبر پښتونخوا حکومت افغانستان ته د دوو پلاویو د استولو طرحه وروستۍ کړې ده.
د خېبر پښتونخوا رسنیز سلاکار محمد علي سیف ویلي، لومړی پلاوی به له طالبانو سره د خبرو لپاره لومړني چمتووالی ونیسي.
سرچینې زیاتوي چې دغه راز به تر لومړني پلاوي وروسته د خېبر پښتونخوا اعلی وزیر، علي امین ګنډاپور په مشرۍ دویم پلاوی له طالبانو سره د فرضي کرښې اړوند سیمو پر ډیپلوماسۍ،اقتصادي او ټولنیزو اړیکو خبرې وکړي.
د طالبانو حکومت تر دې مهاله په دې اړه څه نه دي ویلي.
د خیبر پښتونخوا پلاوي داسې مهال افغانستان ته د راتګ پلان طرحه وروستۍ کړې چې، په پاکستان کې په دې وروستیو کې نا امني تر بل هر وخت زیاته شوې ده.
پاکستاني لوری د ناامنۍ پړه پر طالبانو اچوي خو د طالبانو حکومت بیا په ځلونو ډاډ څرګند کړی چې افغان خاوره به د هیچا پرضد ونه کارول شي.
د طالبانو حکومت بیا پاکستان د داعش پر ملاتړ تورن کړی او ویلي یې دي چې داعش په پاکستان کې پناه ځایونه لري.