تاند【چهارشنبه د سلواغې ـ دلوې ۲۴مه】د افغانستان د کرېکټ ملي لوبډله نن سهار (چهارشنبه، د سلواغې ۲۴مه) د اتلولۍ جام سیالیو کې د ګډون په موخه د پاکستان لاهور ښار ته ورسېده.
کرېکټ بورډ رسنیو ته ویلي، چې ټاکل شوې چې د ملي لوبډلې دوهم تمریني کېمپ د دغو سیالیو د چمتووالي لپاره په دغه هېواد کې ترسره کړي.
کرکټ بورډ دغه راز ویلي، چې د ملي لوبډلې ځوان ورو توپ اچوونکی الله محمد غضنفر د کرکټ نړیوالې شورا د اتلانو جام (چمپینز ټرافي) له سیالیو بهر شو.
نوموړی د زمبابوې پر وړاندې د سیالیو پر مهال د ملا د L4 مهرې چپ اړخ کسر کړی، چې د پوره درملنې سربېره لا هم له یادې ناروغۍ سره لاس او ګرېوان دی.
د نوموړي پر ځای ننګیال خروټی، چې له دې وړاندې د احتیاطي لوبغاړو په ډله کې و، د چمپینز ټرافي سیالیو لپاره اصلي نوملړ ته اضافه شوی دی.
د ملي لوبډلې بل تکړه ورو توپ اچونکی مجیب الرحمن هم تر اوسه په یو ورځنیو سیالیو کې د ګډون جوګه نه دی او د ډاکټر له سپارښتنې سره سم به د یوې مودې لپاره له یو ورځنیو سیالیو لېرې وي.
ـــــ
د غزني په جاغوري ولسوالۍ کې د ٣٢ لوبډلو ترمنځ د فوټسال سیالۍ پیل شوې.
د غزني د ورزش آمریت مسوولین وایي، دغه سیالۍ په اتو پړاونو کې ترسره کیږي چې موخه یې د ځوانانو ترمنځ د همغږۍ او یووالي رامنځته کول دي.
ــــ
د مزارشریف وزلوبې ټورنمېنټ د پیل مراسم نن مازیګر او رسمي لوبې یې سبا پنجشنبه پیلیږي.
د یادونې وړ ده، چې د دې ټورنمېنټ ټولې لوبې په ژوندۍ بڼه پر مليسپورټ او د مليسپورټ له ټولنیزو پاڼو څخه خپریږي.
ـــــ
د هند او انګلستان ترمنځ درېیمه او وروستۍ یو ورځنۍ لوبه نن چهارشنبه ترسره کیږي.
دغه ستره سیالۍ نن غرمه ۱۲:۳۰ بجې په احمد اباد کرېکټ لوبغالي کې پیل شوه.
د یادونې وړه ده، چې دغه لوبلړۍ له وړاندې هند ۲ ـ ۰ ګټلې ده.