تاند【سه شنبه د سلواغې ـ دلوې ۲۳مه】په کابل کې د چین سفیر ژاو شینګ ویلي، هېواد یې د واخان لارې پرانېستلو او چین سره د افغانستان نښلېدو کې هیڅ ستونزه نه لري.

ژاو شینګ زیاته کړې،چې د دغې لارې په پرانېستل کېدو سره به په بېلابېلو برخو کې پرمختګونه رامنځته شي.

نوموړي دغه څرګندونې د طالبانو د حکومت د ریاست الوزراء د دفتر رئیس ملا عبدالواسع سره کتنه کې کړې دي.

ژاو شېنګ ویلي،چې دا مهال د چین له لوري بامیانو کې د برېښنا رسولو، کندهار کې د روغتونو جوړول او تخار کې د آمو سیند تېلو پروژې چارې روانې دي.

دغه لوړ پوړي چینایي چارواکي زیاته کړې، چې له ۲۰۲۱ کال وروسته د چین او افغانستان اړیکې لا پیاوړي شوې او د دواړو هېوادونو ترمنځ راشه درشه او سوداګري زیاته شوې ده.

بل لورته د طالبانو د ریاست الوزراء د دفتر رئیس ملا عبدالواسع له چین غوښتي، چې د طالبانو د حکومت رسمیت پېژندنې برخه کې خپلې هڅې نه سپموي.

د واخان دهلېز اقتصادي ارزښت

د واخان دهلېز د بدخشان ولایت په واخان ولسوالۍ کې موقعیت لري، یوه تنګه دره ده چې د چین هېواد له سینکیانګ ولایت سره پوله لري او د تاجکستان د ګورنو – بدخشان خودمختاره سیمه د پاکستان تر کنټرول لاندې کشمير له ګلګت بلتستان سیمې څخه جلا کوي.

د واخان درې پامیر له هسکو غرونو څخه د پنج او پامیر سیندونه راوتلي او په پایله کې د امو سیند جوړوي. د واخان درې اوږدوالی شاوخوا ۳۵۰ کیلو مټره او پلنوالی یې له ۱۳ څخه تر ۶۵ کیلو مټرو پورې رسېږي.

د واخان دهلېز په ۱۹مه پېړۍ کې د وخت د دوو لویو زبرځواکونو (روسانو او انګریزانو) د سترې سیاسې لوبې په نتیجه کې رامینځته شو او دواړو طرفونو له لوري د بفر زون په صفت وپېژندل شو.

که څه هم واخان ته د تګ او راتګ لاره خرابه ده، خو د تاریخ په اوږدو کې د ختيځې، سویلي او مرکزي آسيا هېوادونو د وګړو لخوا د سوداګریزې لارې په توګه کارول کېده.