تاند (دوشنبه، د سلواغې/ دلوې ۲۲ مه) په افغانستان کې د ایران لوړپوړي استازي علي رضا بیکدلي ویلي چې د هلمند د سیند د اوبو د حق پر سر د ایران اوږدمهاله شخړه له طالبانو سره د مذاکراتو له لارې حل شوې ده.
د ایران د رسنیو د راپورونو له مخې، بیکدلي ویلي چې دا توافق د ایران د بهرنیو چارو وزیر عباس عراقچي په مشرۍ د ایراني پلاوي او د طالبانو د مشرانو ترمنځ د خبرو پایله ده.
بیکدلي زیاته کړه:
«د بهرنیو چارو د وزیر د وروستي سفر پر مهال، د افغانستان چارواکو (طالبانو) یو ځل بیا د ۱۳۵۱ هـ.ش د اوبو د تړون پر عملي کېدو ټینګار وکړ او د سیستان او بلوچستان د اوبو اړوند ستونزو ته د اسلامي ورورولۍ له روحيې سره د حل اراده یې وښوده.»
د ایران او افغانستان اقتصادي اړیکې
بیکدلي د ایران او افغانستان اقتصادي اړیکې هم مهمې وبللې او ویې ویل چې د دواړو هېوادونو دوه اړخیز تجارت په تېرو نهو میاشتو کې له ۲ میلیارده ډالرو اوښتی دی.
هغه وویل چې د اقتصادي همکاریو پراختیا د تهران لپاره یو لومړیتوب دی.
د مخدره موادو پر ضد د طالبانو اقدامات
ایراني دیپلومات د تریاکو د کر او د مخدرو موادو د قاچاق پر ضد د طالبانو بندیز وستایه او د مخدرو موادو د کنټرول او د ترهګرۍ ضد مبارزې په برخه کې یې د ایران ژمنتیا یو ځل بیا تکرار کړه.
هغه وویل:
«د ترهګرۍ او افراطیت پر ضد مبارزه زموږ د همکاریو یو مهم اړخ دی. دا مهال دواړه هېوادونه د ترهګرۍ پر ضد په اقداماتو کې ښکېل دي.»
کابل ته د عباس عراقچي سفر
د ایران د بهرنیو چارو مرستیال وزیر عباس عراقچي د جنورۍ پر ۲۶مه کابل د یوه سیاسي او اقتصادي پلاوي په مشرۍ کابل ته سفر وکړ.
هغه په دې سفر کې د طالبانو له رييس الوزرا، بهرنیو چارو او دفاع وزیر سره خبرې وکړې.
د ایران د بهرنیو چارو وزارت دریځ
د ایران د بهرنیو چارو وزارت ویاند اسماعیل بقایي د عراقچي سفر له طالبانو سره د متقابلو ګټو او اندېښنو پر بنسټ د دوامداره تعامل یوه برخه وبلله.
د ایراني چارواکو په وینا، په دې خبرو کې د هلمند د اوبو د حقونو، د ترهګرۍ ضد مبارزې، د مخدره موادو کنټرول، کډوالو، او د سرحدي امنیت په ګډون یو شمېر مهم موضوعات وڅېړل شول.