تاند (سې شنبه، د سلواغې/ دلوې ۱۶ مه) د ایران د بهرنیو چارو وزیر وايي چې په ایران کې بې مورده د “طالبوفوبیا (له طالبانو ویره) د خپرولو هڅې کېږي.
د ایران د ملي امنیت او بهرني سیاست د کمیسیون ویاند، د عباس عراقچي له قوله ویلي: «په هېواد کې له روسیې، چین او طالبانو د ویرې خپرولو یو جریان شته.» .
ابراهیم رضایي زیاته کړه چې عباس عراقچي د دوشنبې په ورځ د ملي امنیت کمیسیون غونډې ته د افغانستان او قطر د سفر راپور ورکړ.
عباس عراقچي د یکشنبې په ورځ، د دلوې په ۷مه، د یوه سیاسي او اقتصادي پلاوي په مشرۍ کابل ته سفر وکړ.
دا له کله چې طالبان واک ته رسېدلي، افغانستان ته د ایراني د بهرنیو چارو د یوه وزیر لومړی سفر و.
عراقچي د دې سفر په ترڅ کې د طالبانو د ادارې له جګپوړو چارواکو سره ولیدل.
رضایي وویل چې عراقچي له طالب چارواکو سره د اوبو د حق، کډوالو، د پولو د امنیت، د شیعه اقلیت د امنیت، مخدرو موادو، د فارسي ژبې، د داعش د فعالیتونو او له افغانستان سره د سوداګرۍ په اړه خبرې وکړې.
که څه هم د ایران اسلامي جمهوریت د نورو هېوادونو په څېر د طالبانو حکومت په رسمیت نه پېژني، خو له دې ډلې سره نژدې اړیکې لري.
په افغانستان کې د طالبانو له واک ته رسیدو وروسته ایران د افغانستان تر ټولو په ستر سوداګري شریک بدل شوی دی.