تاند【یکشنبه د سلواغې ـ دلوې ۱۴مه】د امریکا ولسمشر ډونالډ ټرمپ په سومالیا کې د داعش وسلوالو پر وړاندې د هوایي بریدونو امر وکړ.
نوموړي پرون د شنبې په ورځ د سلواغې ۱۳مه دا امر کړی دی.
دا د ولسمشرۍ په دوهیم پېر کې پوځ ته د ټرمپ د هوایي برید لومړنی امر دی.
د نوموړي د څرګندونو له مخې، د برید موخه “د داعش د برید لوړ پوړی پلان جوړوونکي” و.
ټرمپ پخپله ټولنیزه شبکه “ټروث” کې لیکلي: “نن سهار ما د داعش د برید د لوړ پوړي پلان جوړوونکي او نورو ترهګرو پر وړاندې، چې هغه په سومالیا کې استخدام او رهبري کول؛ د هوایي بریدونو امر ورکړ.
ټرمپ یاده ډله قاتلان بللي او د ټرمپ په وینا دوی په سوړو او غارونو کې پټ ول، امریکا او زمونږ متحدین یې ګواښل.