شمالي وزیرستان کې ۱۳ پاکستاني پوځیان مړه او ژوبل شوي

تاند【جمعه د سلواغې ـ دلوې ۱۲مه】د خیبر پښتونخوا په شمالي وزيرستان سیمه کې پرون پنجشنبه له وسله والو سره په دوه جلا نښتو کې د پاکستاني پوځ پنځه غړي وژل شوي دي.

پاکستاني رسنۍ وایي دغه راز په دې نښتو کې ۸ پوځيان ټپيان شوي هم دي.

پاکستاني امنیتي سرچینې وايي، ټپيان پولیس روغتون ته لېږدول شوي، او امنیتي ځواکونو سیمه کې د وسله والو پر ضد عملیات پیل کړي.

د راپورونو له مخې په دې وروستیو کې د خیبر پښتونخوا په بېلابيلو سیمو کې د وسله والو بریدونه زیات شوي دي.

وروستیو نا امنیو پاکستانیان سخت اندېښمن کړي او د ژوند کړۍ یې پرې تنګه کړې ده.

د دې نا امنیو له امله چین هم څو ورځې وړاندې پاکستان کې د خپلو پروژو د امنیت په اړه اندېښنه ښودلې وه.