تاند【سه شنبه د سلواغې ـ دلوې ۹مه】د طالبانو د حکومت د اوبو او انرژۍ وزارت خبر ورکړی، چې په هېواد کې د برېښنا د تولید او پراختیا په موخه په ټولیزه توګه د ۵ زره او ۷۶۷ مېګاواټه برېښنا د تولید لپاره ۳۷ پروژې تر لاس لاندې لري.
یاد وزارت په یوه خبرپاڼه کې ویلي، چې په بېلابېلو ولایتونو کې له بېلابېلو سرچینو د برېښنا پروژې تر لاس لاندې لري.
یاد وزارت اوبه، لمر، ډبرو سکاره او باد هغه لارې یادې کړي، چې ترې د برېښنا د تولید لپاره ګڼې پروژې تر لاس لاندې لري.
سرچینې له یادو لارو په نغلو کې د ۱۰ مېګاواټه لمریزې برېښنا یوه پرژوه بشپړه او ګټې اخیستنې ته سپارلې ده.
باور دا دی، چې افغانستان د بریښنا تولید لپاره مناسب هېواد دی،خو د وخت حاکمو نظامونو د بې پروایئ له امله دا هېواد اوس هم د برښنا برخه کې د نورو احتیاج دی.
د نظرخاوندان وایي که د هېواد په داخلي اوبو پانګونه وشي او پرې د برېښنا بندونه جوړ شي، نو په دې برخه کې به له احتیاجه د خلاصون ترڅنګ پر نورو هېوادونو هم برېښنا د پلور لپاره ولرو.