تاند (سې شنبه، د دلوې/ سلواغې ۳ مه) د طالبانو د بهرنیو چارو وزارت نن (سې شنبې) اعلان وکړ چې دوی له اوږدو خبرو وروسته، چې د قطر په منځګړیتوب وشوې، د یو افغان وګړي خان محمد په بدل کې دوه امریکایي بندیان تبادله کړي دي.
د وزارت پر اساس، خان محمد، چې په متحدو ایالتونو کې د عمري بند سزا ګاللـه، خوشې شوی او د تبادلې د یوې برخې په توګه افغانستان ته راستون شوی دی.
وزارت وویل چې خان محمد شاوخوا دوې لسیزې وړاندې په ننګرهار ولایت کې د امریکایي ځواکونو له خوا نیول شوی و. هغه د څو امریکایي اتباعو په بدل کې تبادله شوی دی.
طالبانو د دې امریکایانو په اړه جزییات ورنه کړل، خو د سيایناین تلویزیون راپور ورکړی چې رایان کوربیټ او ویلیم مکانټي د دې معاملې په ترڅ کې خوشې شوي کسان دي.
د سيایناین د راپور له مخې، خان محمد د طالبانو غړی و چې په ۲۰۰۸ کال کې د ترهګرۍ او مخدره موادو د قاچاق په تور محکوم شوی و.
امریکایي چارواکو مخکې منلې وه چې د رایان کوربیټ، ګلزمن، او محمود شاه حبیبي په شمول لږترلږه اووه امریکایي اتباع له طالبانو سره بندیان دي. طالبانو د بندیانو تبادله د “مسایلو د حل یوه مثبته بیلګه” بللې او ویلي چې په دې بهیر کې قطر د منځګړیتوب رول لوبولی دی.
خو دې ډلې درېیم کس، محمودشاه حبیبي، چې افغان الاصله امریکايي دی، خوشي کړی نه دی. د هغه په اړه مخکې په راپورونو کې ویل شوي وو چې طالبانو نوموړی په کابل کې د القاعده د مشر ایمن الظواهري د وژل کېدو په تړاو نیولی او وروسته یې القاعده شبکې ته سپارلی دی.
طالبان اوس انکار کوي چې حبیبي نه دوی نیولی او نه ورسره بندي دی.