تاند【یکشنبه د مرغومي ـ جدي ۳۰مه】اسوشیټډ پرېس خبري اژانس راپور ورکړی،چې په امریکا کې د تېرې ورځې (شنبې) راهیسې د اپل او ګوګل په ګډون د اپلیکېشنونو له پلورنځیو هم ټیک ټاک لیرې شوی دی.
ټیک ټاک هم خپلو کارونکو ته خبر ورکړی، چې نور دغه اپلیکېشن نشي کارولی.
خو ډونالډ ټرمپ ویلي، ټیک ټاک ته ۹۰ ورځې وخت ورکوي، څو امریکا کې یې د فعالیت د تړلو مخه ونیسي.
د امریکا سترې محکمې د تېرې جمعې په ورځ هغه قانون تصویب کړ، چې له مخې یې ټیک ټاک باید امریکا کې د فعالیت دوام لپاره له چینایي بایټ ډانس شرکت سره خپلې اړیکې پرې کړي.
ویل کېږي ټیک ټاک په امریکا کې د امنیتي اندېښنو له امله تړل شوی دی.