تاند【یکشنبه د مرغومي ـ جدي ۳۰مه】الجزیرې ټلویزیون په یوه خبر کې ویلي چې، غزه کې نن د سهار شاوخوا ۸:۳۰ اوربند پیل شو.
تر دې مخکې رویټرز خبري اژانس ویلي و، چې د غزې اوربند لومړی پړاو چې ۶اونۍ به دوام وکړي د شاوخوا ۲زره فلسطینیانو په بدل کې د ۹۸بندي اسراییلیانوله ډلې ۳۳خوشې شي.
بل لورته د غزې د رسنیو مرکز هم خبر ورکړی، چې د غزې شمال جبالیه کمپ ته له کلابندۍ او ویجاړۍ وروسته بېرته د خلکو ورستنېدل پیل شوي.
ټاکل شوې د غزې اوربند په درېیو پړاونو کې عملي شي.
د اوربند د عملي کېدو سره سم ملګري ملتونه وايي، غزې ته د بشري مرستو بار ۴ زره ټېلره د ننوتو په حال کې دي.
د ملګرو ملتونو مرستندویه اداره چې د فلسطنیي بېځایه شویو اړوند فعالیت کوي ویلي، په دې مرستو کې اوړه، خواړه او نورې بېړنۍ بشري مرستې موجود دي.
یادې ادارې زیاته کړې، چې د غزې د اوربند تړون وروسته غزه کې د بشري مرستو پر کاروانونو د اسراییلو بریدونه هم کم شوي دي.