تاند【یکشنبه د مرغومي ـ جدي ۳۰مه】د طالبانو د حکومت د سترې محکمې اداري مرستیال عبدالمالک حقاني په مشرۍ یو قضایي پلاوي د ایران د قضایه قوې د نړۍوالو چارو له مرستیال کاظم غریب ابادي سره لیدلې دي
په دې لیدنه کې طالب پلاوي له ایراني لوري غوښتي، چې په دغه هېواد کې پر اعدام د محکومو افغانانو نوملړ له طالبانو سره شریک کړي.
عبدالمالک حقاني دغه راز غوښتنه کړې،چې پر اعدام د محکومو افغان زندانیانو سره دې د اسلامي ورورګلوۍ له مخې نرم چلن وشي او د حسن تعامل له مخې ورته بدیلې لارې ولټوي.
خبرپاڼه کې د ایران د قضایه قوې د نړیوالو چارو د مرستیال په حواله لیکل شوي، چې ایران به نږدې راتلونکي کې یو زر او ۵۰۰ افغان زندانیان افغانستان ته ولېږدوي.
ایران کې په دې وروستیو کې د افغانانو اعدامونه زیات شوي، چې دې چارې د بشر نړیوال ملاتړي اندېښمن کړي دي.
عام افغانان وایي ایراني لوری د دې ترڅنګ له افغان کډوالو سره هم سخت او ناوړه چلند نه کار اخلي.
اوس هم د ایران په زندانونو کې زرګونه افغانان د خلاصون په ارمان شپې ورځې سبا کوي.